Гутереш „згрозен“ од нападот на Израел врз конвој на брзата помош во Газа
Генералниот секретар на Обединетите Нации Антонио Гутереш е „згрозен од нападот“ на израелските сили врз конвојот амбулантни возила во Газа во петокот, се вели во соопштение.
„Конфликтот мора да престане“, се наведува во соопштението.
Палестинската Црвена полумесечина соопшти дека едно од нивните амбулантни возила било погодено од „проектил испукан од израелските сили“ на само неколку метри од влезот во болница во градот Газа, а во нападот загинале 15 луѓе, а повеќе од 60 се ранети.
„Згрозен сум од пријавениот напад во Газа врз конвој на брза помош пред болницата Ал Шифа. Фотографиите на тела на улицата надвор од болницата се шокантни“, наведе Антонио Гутереш во соопштението.
Израелската војска соопшти дека извршила воздушен напад врз „возило за брза помош, идентификувано од силите дека се користи од терористичка ќелија на Хамас во непосредна близина на нивната позиција во борбената зона“.
Инсистирајќи дека „не ги заборавил терористичките напади извршени од Хамас во Израел“, шефот на ОН додаде дека „речиси еден месец, цивилите во Газа, вклучително и деца и жени, се опколени, не им се дава помош, се убиваат и се протерани од нивните домови.
„Тоа мора да престане… Хуманитарната ситуација во Газа е ужасна. Нема доволно храна, вода и лекови, додека горивото за напојување на болниците и постројките за вода е при крај“, предупредува тој.
Засолништата на ОН во Газа додава, „имаат речиси четири пати поголем капацитет и се бомбардирани“.
„Мртовечниците се полни. Продавниците се празни. Санитарната состојба е катастрофална. Гледаме зголемување на болестите и на респираторните заболувања, особено кај децата. Целото население е трауматизирано. Никаде не е безбедно”, рече тој.
Гутереш повторно повика на прекин на огнот и ослободување на заложниците кои ги држи Хамас по нападот на 7 октомври.