Двајца скопјани синоќа биле нападнати од група навивачи во Тетово, при што едниот бил повреден. Во нападот им го оштетиле и возилото, соопшти Министерството за внатрешни работи.

Полицијата го приведе водачот на навивачка група.

„Вчера во 20:10 часот во населба Дреновец во Тетово, полициски службеници од СВР Тетово го лишија од слобода Р.Е.(23) од Тетово, водач на навивачка група. Тој се сомничи дека околу 19:20 часот на улица „Иво Лола Рибар“ во Тетово заедно со неколку лица со маски на главите физички ги нападнале А.Ј. (22) и Д.П. (22) двајцата од Скопје, при што употребиле и тврди предмети и му нанеле повреди на А.Ј. и го оштетиле нивното возило „мазда 3““ соопшти МВР.

Тој е задржан во полициска станица, извршен е увид и по целосно расчистување и документирање на случајот ќе биде поднесена соодветна пријава.