Пожарот во хотелот Гранд Картал во Болу, Турција во кој загинаа 78 лица, а 50 беа повредени, избувнал кога четиричлена екипа во кујната, подготвувајќи појадок, се обидела да го изгасне запаленото врело масло со вода, поради што пламенот се проширил. . Од приведените, 19 лица се уапсени под обвинение за „намерно невнимание кое довело до смрт и повреда на повеќе лица“.

Пожарот се случи на 21 јануари во хотелот Гранд Картал, лоциран во ски-центарот Карталкаја на врвот на планината Короглу. Пожарот бил пријавен во 03:21 часот, по што на лице место биле испратени противпожарни екипи, пренесува Хуриет.

По несреќата, Обвинителството во Болу покрена истрага, во која беа приведени 26 лица, меѓу кои и сопственикот на хотелот Халит Ергул.

Во текот на истрагата почнале да се откриваат околностите кои довеле до пожарот. Според изјавите на осомничените, готвачот Фајсал Јавер и кујнските работници Мехмет Гундуз, Јусуф Караханли и Фидан Курч отишле во кујната да подготват појадок. За време на подготовката маслото на скарата се прегреало и се запалило.

Во паника работниците во кујната се обиделе да го изгаснат пламенот истурајќи вода врз маслото, поради што пожарот експлозивно се проширил. Пламенот брзо се проширил на просторот над скарата, се проширил и на системот за вентилација, а преку оџакот стигнал и до другите делови од зградата.

Откако сфатиле дека не можат да го контролираат пожарот, работниците во кујната исплашени избегале од објектот. Пожарот кој започнал во кујната набрзо се проширил и го зафатил целиот хотел.