Во ресторан на McDonald’s покрај езеро, опкружен со планини во центарот на швајцарскиот град Лугано, еден клиент нарачува кафе и прашува дали може да плати со биткоин. Продавачот му дава уред кој изгледа како терминал за картички, но станува збор за машина за плаќање со криптовалути, која градската влада ја дистрибуирала бесплатно на локалните трговци, пишува BBC- пренесува Политика.

Плаќањето се врши бесконтактно, од дигитален паричник на мобилен телефон, а сметката е 0,00008629 биткоини, што е околу 8,80 долари. Додека повеќето сопственици на биткоини ја гледаат криптовалутата првенствено како инвестиција, ситуацијата е поинаква во Лугано.

Во овој град во италијанскиот дел од Швајцарија, околу 350 продавници и ресторани прифаќаат биткоин, додека локалната самоуправа дозволува и плаќање за одредени јавни услуги, вклучително и предучилишно образование, во криптовалути.

Еден корисник е Николас од Франција, кој вели дека плаќањето со биткоин му дава чувство на слобода бидејќи не е зависен од традиционалниот финансиски систем и неговите посредници. Во Лугано се користат и претплатени картички, кои се купуваат во швајцарски франци, а потоа износот се префрла во дигитален паричник во биткоин.

Керубино Фрај, сопственик на луксузната продавница за чанти и часовници „Винтиџ Наса“, вели дека прифаќа биткоин бидејќи трошоците за обработка на трансакции се пониски отколку со картичките. Провизиите за биткоин се генерално под еден процент, додека дебитните картички можат да достигнат 1,7 проценти, а кредитните картички до 3,4 проценти. Сепак, тој признава дека плаќањата со биткоин во моментов се спорадични.

Во 2022 година, градот Лугано, во соработка со крипто платформата Tether, ја започна иницијативата „План Б“, со цел да ги едуцира граѓаните за криптовалутите и да го претвори Лугано во европски центар за биткоин. Директорката на центарот, Мир Липони, изјави дека единаесет дена, поради проблеми со банката, била принудена исклучиво да користи биткоин и дека е можно речиси целосно да се функционира во Лугано на тој начин, иако сè уште не е можно да се плаќаат сметки за јавен превоз, гориво или енергија.

Сепак, искуствата од други земји предупредуваат на ограничувањата на ваквите проекти. Ел Салвадор го воведе биткоинот како законско средство за плаќање во 2021 година, но се покажа дека е во голема мера непопуларен кај граѓаните во нивниот секојдневен живот. Од друга страна, Љубљана беше прогласена за град најпријателски настроен кон криптовалутите, пред Хонг Конг и Цирих.

Скептици има и во самиот Лугано. Серхио Роси, професор по економија на Универзитетот во Фрибург, предупредува за нестабилноста на биткоинот, ризикот за репутацијата и фактот дека криптовалутите немаат исти државни гаранции како банкарските депозити. Граѓани како студентката Лусија изразуваат загриженост за поврзаноста на криптовалутите со криминалот и шпекулациите.

Градоначалникот на Лугано, Микеле Фолети, ги отфрла тврдењата дека градот би можел да стане магнет за парите на криминалците, нагласувајќи дека традиционалните пари можат да се користат и за легални и нелегални цели. Тој наведува дека доаѓањето на крипто-индустријата веќе имало позитивен ефект, бидејќи во Лугано веќе има 110 компании од тој сектор.