Директорот на Центарот за управување со кризи (ЦУК), Мухамед Али, информира дека поради обилните врнежи на дожд кои го зафатија западниот регион, преку единствениот број за итни повици 112 е добиена пријава за големо и опасно свлечиште во тетовското село Шипковица.

Свлечиштето е во населено место и претставува опасност за жителите. Директно се загрозени четири куќи. Активиран е Кризниот штаб на Општина Тетово, а на терен се луѓе од ЦУК, СВР Тетово и Градежен инспекторат од Општина Тетово.

„Во моментот се преземаат мерки и се дадени насоки на месното население да го напуштат живеалиштето поради опасност од појавување на нови свечишта“, велат од ЦУК.

На територијата на Општина Штип евидентирани се одрони на камења на патниот правец Делчево-Истибања, каде што екипи на ЈП „Македонијапат“ редовно интервенираат и нема застои во сообраќајот.

Одроните на патот кон с.Моштица во Општина Македонска Каменица, од страна на екипи на „ЈП Камена река“ е извршено чистење на одронот и сообраќајот на тој патен правец се одвива редовно, додаваат од ЦУК.