Зоран Јовановски, поранешен потпретседател и кандидат за претседател на Социјалдемократскиот сојуз, кој сега е втор човек во Стопанската комора на Македонија, вели дека замрзнувањето на цените „не е пазарно решение“ и дека „товарот на кризата не смее да го носи само една индустрија, туку да се распредели врз грбот на сите по малку“.

„Државата може да интервенира во време на криза, но треба да дава финансиска помош само на семејствата на кои им е потребна. Замрзнатата цена на лебот ја користат и тие што немаат пари и оние кои можат да платат петпати поскап леб. Зошто и ним да им е достапен лебот со субвенционирана цена? – прашува Јовановски во изјава за порталот „Пари“.

Според него, решението е цената да биде пазарна, произлезена од понудата и од побарувачката.

„Финансиска помош да даде државата на ниво на семејство, не на поединец. Тоа семејство ќе купува леб по замрзната цена, а сите други ќе си плаќаат пазарна цена. Кога цената е пазарна, и тој што го произведува брашното, и пекарот и трговецот, сите во ланецот нормално ќе се однесуваат. Дали е обврска на пекарот, млекарот или некој друг од прехранбената индустрија да се грижи за социјалниот статус на граѓаните? Ако сум јас пекар, дали е мое јас да се грижам за социјалниот статус? Дали јас функционирам во пазарна економија? Тоа е клучното прашање. Ако да, зошто тоа да биде само на тие што се во прехранбената индустрија? Зошто таа обврска да не важи и за некоја друга индустрија?“ – прашува Јовановски.

Тој смета дека доколку би биле координирана пазарна економија, тогаш „би седнале, би се договориле и би се организирале во општеството, па товарот ќе падне по малку на сите“.