Легендарниот италијански стратег Фабио Капело бурно реагираше по елиминацијата на Италија од Босна и Херцеговина во финалето од баражот за Светското првенство 2026, оценувајќи дека националниот тим се соочува со една од најтешките кризи во модерниот италијански фудбал.

„Цела ноќ не склопив око, сè уште не можам да поверувам што се случи. Зборуваме за трикратен светски шампион, ова е спортска трагедија, огромен срам. Една од најлошите работи што му се случиле на италијанскиот фудбал во поновата историја“, изјави Капело, не штедејќи критика кон ситуацијата.

Тој потенцира дека проблемот е многу подлабок од само резултатите на теренот, наведувајќи дека е потребна целосна реконструкција на системот.

„Мора да се соберат експерти, да се анализира што се случува и обновата да почне од темел. Проблемот не се само резултатите, туку структурата“, нагласи Капело.

Италијанскиот тренер ја истакна и неопходноста од сериозни инвестиции во младинскиот фудбал и создавање нова база за иднината на националниот тим.

„Ќе биде многу тешко да се опоравиме од ова, но верувам дека токму овој удар може да биде почеток на вистинска обнова. Италија мора повторно да се измисли“, додаде тој.

ВИДЕО: Донарума збесна по поразот на Италија – сакаше да се тепа на теренот во Зеница

ВИДЕО | БиХ не спиеше ноќеска – се славеше пласманот на Светското првенство

ВИДЕО | Историската победа на БиХ на трибините во Зеница ја славеше и Ѓоковиќ

ФОТО | Познати се сите 48 учесници на Светското првенство ова лето