Најдобрите на Бродвеј беа наградени во неделата вечерта во „Radio City Music Hall“ во Њујорк, пишува „CNN“. Доделувањето на наградите „Тони“ го водеше Аријана ДеБоуз, која неодамна глумеше во филмот „West Side Story“ и доби Оскар за најдобра споредна женска улога.

„A Strange Loop“ ги зеде наградите за најдобар мјузикл и најдобра книга на мјузикл. Претставата, која следи амбициозен драматург и неговите вртоглави, персонифицирани мисли, ја доби Пулицеровата награда за драма за 2020 година.

Поп-мјузиклот „MJ“, кој се одвива за време на турнејата на Мајкл Џексон, освои четири награди, вклучувајќи ја и најдобрата изведба на актер во главна улога за Мајлс Фрост, додека Јоакина Калаканго ја доби наградата за најдобрата женска изведба во мјузикл за „Paradise Square“. „The Lehman Trilogy“ освои пет награди меѓу кои и за најдобра претстава. Сајмон Расел Биел ја доби наградата за најдобра главна машка улога во „The Lehman Trilogy“, додека Дидра О’Конел ја доби наградата за најдобра женска улога во „Dana H.“

Наградата за најдобра оригинална музика ја добија Тоби Марлоу и Луси Мос за „SIX: The Musical“.

Минатата година го одбележа триумфалното враќање на Бродвеј, кој беше затворен повеќе од една година поради пандемијата на Ковид-19. Претставите почнаа повторно да се отвораат во септември 2021 година, иако последователните избувнувања на вирусот доведоа до откажување на настаните.