Огромен напис на платно со големина од околу десетина метри на кое се испишани зборовите „I love Cameria“ никна на надвозникот кај плоштадот „Скендербег“ среде Скопје утринава.

За кого е ова наменето, кому му служи и со каква цел е поставено засега не е познато, но изутринава предизвика реакција кај голем број скопјани кои се обратија до нашата редакција. Во интерес на граѓаните но и на јавноста „Слободен печат“ се обрати до Општина Чаир да ни дадат појаснување чив е транспарентот закачен во централното подрачје и дали за истиот е побарана дозвола од општинските власти.

Од Општината Чаир на нашето прашање дали се информирани за поставувањето на ваквиот транспарент кратко ни одговорија дека не знаат кој го поставил.

– Немаме информации кој го поставил транспарентот иако за тоа се информиравме изутринава преку Фејсбук дека таков натпис виси над надвозникот. Во согласност на нашите ингеренции во текот на денот ќе бидат испратени инспекциски служби да направат увид. Од она што сме информирани засега можеме да кажеме дека вечер на плоштадот „Скендербег“ ќе има културен фестивал со музичка содржина, но дали некој од организаторите го поставил транспарентот или не засега не можеме да потврдиме – велат надлежните од Општина Чаир.

Инаку Чемерија е називот кој Албанците го користат за јужните делови на Албанија и дел од Епир, кој не е прифатлив за Грците, зошто генерално се поврзува со албанскиот иредентизам. Чемерија е дел и од идејата за Голема Албанија и „природното“ поврзување на етничките Албанци.