ФОТО+ВИДЕО | Еднобојна жирафа, единствена на светот, родена во зоолошка градина во Тенеси
Зоолошката градина во Тенеси, САД доби нов жител, еден од најретките во животинското царство – еднобојна жирафа.
Женката е родена на 31 јули и нејзиното тело е целосно кафено, наместо да ги има карактеристичните шари. За неа се верува дека е единствениот таков примерок во светот.
Младенчето брзо расте и веќе е високо 1,83 метри, а за него се грижат мајката и персоналот во градината, пишува „Гардијан“.
Вработените во зоолошката градина се надеваат дека необичното бебе ќе го привлече вниманието на јавноста кон овој вид, кој е се поблиску до исчезнување. Имено, повеќе од 40 отсто од дивите жирафи се истребени во последните три децении.
Во тек е јавен конкурс за избор на име за новата жирафа, а во потесниот избор влегоа Кипеки, што значи „уникатна“ на свахилски јазик, Фирајали што значи „необична“, Шакири – „најубава“ и Џамила – „убавица“.