ФОТО+ВИДЕО I Вештите раце на креативниот тим од училиштето Братство создадоа вистинска бајка: Sирнете во светот на „Децата и животните“
– Срцата ни се полнат кога гледаме колку се среќни нашите ученици кои сега можат да го користат новото еко-училишно катче кое го нарековме „Децата и животните“. Нашиот училиштен двор сега има естетско уметничка и едукативно – креативна содржина, не го кријат задоволството вработените во Основното училиште „Братство“ кое се наоѓа во срцето на Општината Карпош.
Педагогот Марина Хаџипанзова и економот Славица Ивановска раководени од директорката на училиштето Рухије Сали, поттикнати од јавниот повик на Оштина Карпош за создавање и креирање на „Најуреден еко-училиштен двор/катче“ за само неколку дена задно со наставниците и родителите и техничкиот персонал меѓу кои Невзат Лазумов и Лазе Василевски создадоа магична атмосфера исполнета со шарени цвеќиња и весели животинки.
Тие за Слободен печат велат дека се многу среќни бидејќи еко – училницата на училиштето „Братство“ е една од наградените на натпреварувачкиот повик на кој учествуваа сите десет општински училишта.
– Еко-училницата ќе ја користиме во рамките на проектот „Унапредување на писменоста и усвојување на странските јазици кај учениците преку развивање на знаења, вештини, ставови и вредности“, но и за други воннаставни активности. Исто така овој весел простор ќе се користи за реализација на наставни часови по сите предмети според потребите на соодветните наставни содржини во сите одделенија, рече директорката.
– Креативниот тим за сите изработени елементи и фигури кои го облагородуваат просторот се инспирираше од љубовта кон природата и животните. Материјалот кој го користевме е рециклиран со што всушност е задоволен еден од еко критериумите за здрава и чиста животна средина. Преку талентот и вештите раце на креаторите се создаде пријатен простор за учениците, наставниците, родителите и стручните соработници, додаде Сали и нагласи дека задоволството е уште поголемо бидејќи родителите пружија максимална помош како во донација на материјални средства така и во изработката.
Ова не е прв успех за училиштето „Братство“. Наставниците и останатите вработени за време на пандемијата вложија многу труд да го намалат психолошкиот стрес кај учениците предизвикан од пандемијата ковид-19.
Учениците, наставниците и родителите зедоа активно учество во онлајн работилници, поврзани со личниот и психо-емоционален развој кои беа реализирани од страна на еминентни психијатри и психолози во рамките на програмата „Чекор по чекор“ и УСАИД.
Исто така во соработка со Бирото за развој на образование, Македонски центар за граѓанско образование и МОФ, училиштето со тим наставници по математика, историја и стручен соработник педагог зедоа учество во реализација на ученички иницијативи за поттикнување на демоктарска клима во училиштето – Отворен ден за граѓанско образование. За таа цел учениците од 7-9 одделение учествуваа со изготвен спот на тема „Сличности и разлики меѓу децата“ со што ги изнесоа своите искази за сличностите и разликите на повеќе јазици.
Училиштето зеде активно учество во реализација на едукативни содржини преку ТВ – училница и видеолекции – Едуино со кои се истакнаа во креативноста, а исто така успеа да биде дел од меѓународниот водео спот посветен на Денот на Европа во кој учениците пеат заедно со 19 светски познати музичари.