Светот на играчките загуби еден од своите најголеми визионери. Роџер Свит, долгогодишниот дизајнер на компанијата „Мател“ и човекот кој го создаде култниот акциски јунак Хи-Мен, почина во вторникот на 91-годишна возраст, по долготрајна борба со деменција. Свит беше клучната фигура во одделот за дизајн на „Мател“ во текот на 70-тите и 80-тите години.

По големата грешка на компанијата во 1976 година, кога ја одбија понудата за производство на играчки за „Војна на ѕвездите“ (Star Wars), тимот се фрли на работа за да создаде сопствен херој.

Роџер Свит експериментирал со глина, додавајќи му мускули и моќен борбен став на тогашниот модел „Big Jim“. Токму тој прототип стана основа за Хи-Мен, кој официјално се појави на пазарот во 1982 година и веднаш стана хит.

‘HE-MAN’ creator Roger Sweet has sadly passed away at the age of 91 following a multi-year battle with dementia. pic.twitter.com/Cpj5SP07B1

— DiscussingFilm (@DiscussingFilm) April 29, 2026

„Јас ја имам моќта!“

Само една година подоцна, во соработка со студиото „Filmation“, започна емитувањето на анимираната серија „Хи-Мен и Господарите на Универзумот“ (He-Man and the Masters of the Universe) . Приказната за принцот Адам од планетата Етернија, кој со помош на Мечот на моќта се претвора во Хи-Мен, стана симбол на детството за милиони луѓе низ светот, вклучувајќи ги и генерациите кај нас.

Иако неговиот творец замина, франшизата на „Хи-Мен“ продолжува да живее. Веќе на 5 јуни во кината пристигнува долгоочекуваниот акциски филм „Masters of the Universe“. Главната улога ја толкува Николас Галицин, а во филмот ќе ги видиме и холивудските ѕвезди Џаред Лето, Алисон Бри и Идрис Елба.

Роџер Свит зад себе ја остави сопругата Марлен, но и вечното наследство на најмоќниот човек во универзумот.