ФОТО: Оштетена сајлата од жичарницата Тетово-Попова Шапка, голема опасност за луѓето
Сајлата од жичарницата Тетово- Попова Шапка која повеќе од две децении е надвор од употреба е ризик за луѓето.
На повеќе места таа е оштетена, и е навалена долж патот кој води кон скијачкиот центар.
Алпинистот Надир Мурсели вели дека постои опасност сајлата да се скине оти ваквите сајли си имаат животен век од 10 до 15 години, а оваа е стара 6 децении.
-Сајлата е обложена со челични влакна и како што може да се види, оваа обвивка на повеќе места е оштетена. Сајлата на некои места поминува и над објекти па евентуално ако се скине останува прашање што се може да се случи.
Друг недостаток на сајлата е што таа на некои места се спушта над патот што води кон Попова Шапка. Доколку таа се спушти до самиот пат тогаш возилата не ќе можат да поминуваат. Од она што го истражував речиси никаде во светот нема оставено жичара која не функционира. Во случај да е надвор од употреба тогаш сајлите мора да се отстранат – вели алпинистот Надир Мурсели.
Од Скијачкиот центар Попова Шапка велат дека во план е сајлата целосно да се острани, но сепак за тоа треба процедура оти се работи за голема сајла, која е на повеќе места оштетена.
-Од страна на техничко одговорно лице се олабавува сајлата одвреме на време за да не се скине, па да направи посериозни проблеми. Реално сајлата треба да се отстрани целосно од столбовите. Наша надлежност е да се тргне. Ќе видиме, имаме во план, работиме на тоа да направиме некоја постапка за да ја отстраниме целосно сајлата.
Баравме да се направи увид од техничка инспекција за да имаме насоки, а ќе исконтактираме и со инженерите од Машински факултет коишто ни прават испитувања и за другите жичарници. Тие треба да ни дадат конкретна некоја насока што да преземеме за да можеме да ја отстраниме сајлата. Тоа е стара и огромна сајла и треба да се преземат сериони чекори заради безбедност, за да може да се отстрани. Не можам да кажам конкретно време, но преземаме чекори што се во наша надлежност – изјави Адем Авзиу, управител на ЕЛЕМ Турс.
Жичарницата Тетово-Попова Шапка во воениот конфликт во 2001 година беше оштетена и оттогаш воопшто не е пуштена во употреба. Низ годините имаше ветувања од властите дека истата ќе се рехабилитира, а потоа дека ќе се изгради нова. Но, ниту старата жичарница која сега претставува опасност се острани, ниту пак има некој идеен проект за изградба на нова жичарница до скијачкиот центар Попова Шапка.