При археолошките ископувања на Помпеја, Италија кои се одвиваа во последниве 12 месеци, откриени се исклучително добро сочувани сцени од Тројанската војна. Претставите на Парис и Елена од Троја, Аполон и Касандра, Леда со лебедот се прикажани на неверојатните фрески кои ги сокриле и сочувале лавата и пепелта од вулканот, пишува Би-би-си.

Археолозите веруваат дека сцените со мотиви од Тројанската војна, на фреските во една трпезарија се некои од последните уметнички дела создадени во Помпеја, пред целиот град да исчезне при ерупцијата на Везув во 79 година.

Доминантна тема на овие фрески е херојството, се наведува во соопштението на Археолошкиот парк на Помпеја.

„Ѕидовите се обоени со црна боја за да не се гледа чадот од светилките на нив. Луѓето доаѓале овде да вечераат по зајдисонце, а треперењето на светилките создавале ефект како ликовите на фреските да се движат, особено по неколку чаши вино од Кампанија. Митолошките парови им давале идеи за разговор за минатото и животот, само на прв поглед романтичната природа на реалноста, тие го покажувале односот помеѓу поединците и судбината: Касандра која може да ја види иднината, но никој не ѝ верува, Аполон кој е со Тројанците против грчките освојувачи, но иако е бог не може да ѝ ја обезбеди победата, Елена и Парис, кои и покрај политички некоректната љубовна врска предизвикуваат војна или се само повод. Кој знае? Деновиве Елена и Парис нè претставуваат сите нас“, вели во изјавата Габријел Зактригел, директор на Археолошкиот парк на Помпеја.

На високите црни ѕидови на големата трпезарија се насликани повеќе фрески, а речиси целиот мозаичен под во просторијата содржи повеќе од милион индивидуални мали бели плочки.

Новооткриените фрески не се изработени во традиционален стил, а на нив се прикажани и Леда и лебедот, чија форма ја добил врховниот грчки бог Зевс за да ја заведе Леда, која е насликана заедно со нивната ќерка Елена во средба со Парис. Фреските го прикажуваат и Аполон со пророчицата Касандра.

Британскиот археолог Софи Хеј изјави дека фреските се со многу висок квалитет.

Инаку, трпезаријата е откриена во последните денови од снимањето на документарниот филм наречен „Помпеја: Ново копање“, а првите делови од тој објект се пронајдени минатата година.

Се верува дека објектот на која ѝ припаѓал трпезаријата била во сопственост на политичарот Аулус Рустиус Верус.

Фреските не можат да се поместат, па се заштитени со привремен покрив. Исто така, лепак од гипс се вбризгува и во ѕидовите зад уметничките дела за да се спречи нивното паѓање.