Украсувањето со машни е проверен класик во празничното декорирање – едноставно, елегантно и со доза шарм. Оваа сезона машните се насекаде, а во постојаната потрага по свежи идеи за украсување на елката, посебно внимание привлече божиќната елка на актерката Линдзи Лохан.

Раскошната елка на познатата актерка ја краси голема црвена машна, поставена веднаш под ѕвездата на врвот. Таа совршено ги обрамува црвено-белите украси, меѓу кои се издвојуваат минијатурни лизгалки и помали, пругасти машни, кои му даваат на дрвцето игрив, но софистициран изглед.

Играта со големини и пропорции е одличен начин да се создаде динамично и визуелно привлечно божиќно дрвце. Токму комбинацијата на различни машни – од минијатурни до впечатливи, максималистички – е клучот за складен, а во исто време разигран изглед, по примерот на Лохан, пишува списанието „Хоумс енд гарденс“.

За да се постигне рамнотежа, експертите препорачуваат избор на една доминантна, голема машна што ќе го привлече погледот, дополнета со низа помали детали кои го исполнуваат остатокот од елката.

„Генијалноста на овој пристап лежи во намерната манипулација со визуелната хиерархија. Во професионалното уредување на ентериери често зборуваме за ‘сидрење’ на просторот – со поставување една голема машна близу врвот на елката, се создава јасна фокусна точка што веднаш го привлекува погледот“, вели Меган Слек, уредничка на рубриката „Селебрити стајл“.

Таа додава дека магијата се случува со преминот кон микро-машните: „Контрастот во размерите внесува ритам и спречува погледот да стане статичен. Кога помалите, нежни машнички се распоредени по долните гранки, се додава слој на суптилна текстура што го поттикнува набљудувачот да се приближи и да ужива во фините детали. Тоа е вистинска лекција за рамнотежа – макси-машната носи архитектонска драма, а мини-машните создаваат нежно, шармантно повторување“.