Британскиот крал Чарлс Трети го одбележа своето крунисување со објавува на нова фотографија со двајцата наследници, престолонаследникот Вилијам и неговиот син, принцот Џорџ. Фотографијата е снимена во собата на тронот на Бакингемската палата на денот кога тој беше крунисан.

Кралот седи во центарот на еден од троновите од 1902 година направени за идниот крал Џорџ Петти и кралицата Марија. На фотографијата кралот е во наметка и со царската државна круна и во рацете држи кралско јаболко и жезол со крст. На фотографијата Вилијам и Џорџ стојат од двете страни на кралот и се смешкаат.

Во петокот беше објавена уште една фотографија на која се гледаат Чарлс и Камила со нивните пажови и дворски дами. Исто така е снимена во собата на тронот на Бакингемската палата на денот на крунисувањето. На третата фотографија е прикажан насмеаниот принц Џорџ, како и внуците на кралицата Фреди Паркер Боулс, Гас Лопес и Луис Лопес и правнукот Артур Елиот.

Покрај кралицата Камила стои нејзината сестра Анабел Елиот, а покрај кралот е маркизата од Ландсдаун – која е именувана во кралското домаќинство како придружничка на кралицата во 2022 година.

Фотографиите се направени од Хју Барнард, кој ја снимил и свадбата на Чарлс и Камила во 2005 година.

Крунисувањето на Чарлс Трети го следеле околу 14 милиони гледачи на Би-Би-Си