Ена Веко беше една од највпечатливите и најоригинални појави на македонската музичка сцена во 1990-тите, пред ненадејно да се повлече и да го продолжи животот надвор од земјава. Деновиве, на фејсбук-страницата „ВБУ Воскресение 2025“ беше објавена нејзината стара „лична карта“ од ревијата „Екран“, што повторно го разбуди интересот за неа.

Според тогашниот профил, Ена е родена на 9 февруари 1975 година во Битола. Како омилени музички имиња ги навела Мадона, Џенет Џексон, Мајкл Џексон и Џорџ Мајкл, додека од актерите ги издвојувала Том Круз, Мел Гибсон, Џулија Робертс и Ким Бесинџер. Омилен филм ѝ бил „Танц со волците“, а на прашањето за омилено јадење изненадила со одговорот – жабји копанчиња.

„Сакам: море, сè што е убаво. Не сакам: алкохол, цигари, неискреност, љубомора“, стои во тогашната изјава.

Ена Веко, со вистинско име Елена Домазетовска, важи за првата македонска раперка и за артистка што донесе поинаков звук и енергија на домашната сцена. Нејзината кариера беше релативно кратка, но остави силен печат. Го издаде албумот „Бубачки и градски ѕверки“, а песните „Опера хаус“, „До кога вака“, „Царевата ќерка“ и „Признавам – не признавам“ и денес се паметат.

Зад нејзиниот специфичен музички израз стоеше композиторот и продуцент Тоше Поп-Симонов, кој почина на 19 април минатата година. Ена настапи и на фестивалот „Цветници“, каде се појави со покојниот Мирко Митревски и групата „Академци“.

Денес Ена живее во Сиднеј, Австралија, и изгледа сосема поинаку од периодот кога речиси секоја нејзина песна беше хит. Иако одамна не е активна на сцената, нејзиното име и понатаму предизвикува носталгија кај генерацијата што растеше со нејзиниот автентичен стил.