Објавена е електронска преписка од 2014 година во која се гледа како осудениот сексуален престапник Џефри Епстин бара од член на персоналот да постави скриени видеокамери во неговиот дом во Палм Бич, Флорида. Помошникот одговорил дека планира да ги сокрие во кутии за марамчиња во куќата. Е-поштата е дел од милиони документи објавени од Министерството за правда на САД (DoJ) минатиот месец, пренесува Sky News.

Во е-пошта од 5 февруари 2014 година, Епстин му напишал на својот помошник:

„Ајде да земеме три скриени камери со детекција на движење, кои снимаат, благодарам“.

Пет часа подоцна добил одговор:

„Џефри, веќе купив две камери со детекција на движење вчера во продавница за шпиунска опрема во Форт Лодердејл, ги наполнив синоќа и сега учам како да ги користам… Моментално ги инсталирам во кутии за марамчиња Kleenex“.

Тимот за податоци и форензика на Sky News анализира повеќе од илјада фрагментирани видеа објавени од Министерството за правда. Се чини дека голем дел од нив се снимени во канцеларијата на Епстин во неговиот дом во Флорида.

Едно видео прикажува маж кој наликува на Епстин како разговара со жени во таа просторија. Друга снимка покажува жена како клечи покрај него. Sky News наведува дека не може да потврди кога точно се направени снимките од камерите во канцеларијата.

Според полициските документи, жртвите стравувале дека биле тајно снимани. Анализираните е-пораки и слики укажуваат дека тоа навистина се случувало. Овие наоди доаѓаат откако американската обвинителка Пам Бонди повеќепати се соочи со критики за време на долгото сослушување на комисијата претходно оваа недела.

Во средата, Бонди го даде своето прво сведочење под заклетва откако беа објавени досиејата за Епстин, а сослушувањето во еден момент прерасна во расправија со демократите. Преживеаните жртви на Епстин подоцна ја обвинија дека нема емпатија и човечност, додека критичарите тврдат дека поради тоа што не се објавени сите документи и што многу од нив се силно редактирани, одредени моќни лица и натаму се заштитени.

Бонди, која како шеф на Министерството за правда го надгледува објавувањето на досиејата, го бранеше начинот на кој се спроведува процесот и изјави дека „длабоко жали за сè низ што поминала која било жртва, особено поради ова чудовиште“.

Сепак, таа одби да преземе лична одговорност за почетните пропусти во заштитата на идентитетот на поединечните жртви во објавените документи, додавајќи дека персоналот, под притисок, направил сè што можел.