Планинарското еколошко друштво „Ендорфин“ реагира дека на Пространска (Илинска) Планина, во Кичевско, е направена голема сеча, која, како што велат, сериозно ја оштетила планинарската патека од селото Прострање до врвот Лиска. Воедно е уништена и шумата.

„Голем дел од патеката која со години ја одржувавме и маркиравме – денес е избришан, а на него се наоѓаат остатоци од сеча и голема количина расфрлан отпад. Нашите планинари при теренска акција, денес, собраа дел од отпадот. Ова не е само уништување на една патека, туку и сериозно нарушување на екосистемот со оглед на тоа што пред скоро време беше регистрирана нова единка балкански рис на соседната планина Баба Сач, која се движи и на подрачјето на Илинска Планина. Ова дополнително го загрозува неговото природно живеалиште и чувствителниот биодиверзитет во регионот“, реагираат од „Ендорфин“.

Покрај тоа, велат оттаму, се потценува и долгогодишниот труд на планинарите и љубителите на природата, а истовремено се доведува во прашање безбедноста на сите посетители.

Апелираме до надлежните институции итно да извршат увид на терен, да утврдат одговорност за направената штета и да преземат мерки за заштита. Како планинарско друштво ќе продолжиме да се залагаме за зачувување на планините и патеките, но за тоа е потребна заедничка одговорност и поддршка. Планината не е ресурс за уништување – таа е наше заедничко богатство кое мора да го зачуваме“, се вели во реакцијата на „Ендорфин“.