Во интервју за „Холивуд репортер“, британската поп-пејачка Адел изјави дека најверојатно ќе остане во Лос Анџелес бидејќи сончевото време ѝ помага да ја избегне сезонската депресија, пренесе „Гардијан“.

Пејачката, која е родена и израсната во Тотенхем, северен Лондон, рече дека сончевото време во калифорнискиот град, каде што живее од 2016 година, а минатата година купи вила од 58 милиони долари, е добро за неа.

„Јас страдам од сезонска депресија, така што времето овде е добро за мене, што понекогаш е чудно бидејќи сум Британка“, рече Адел.

Адел истакна дека ужива да живее во Лос Анџелес, град кој во просек има околу 263 сончеви денови годишно.

Сепак, таа призна дека ѝ е емотивна изведбата на нејзината дебитантска песна „Hometown Glory“, која ја напиша во чест на Лондон. Пејачката додаде дека ѝ недостига британската престолнина, но оној Лондон од минатото.

„Се сеќавам како да беше вчера кога ја напишав таа песна… И мислам дека сите не знаат, но ја напишав ден по моето прво учество на протест (против војната во Ирак во 2003 година)“, додаде Адел, која на почетокот од годинава потврди дека се омажила за американскиот спортски агент Рич Пол.

Сезонската депресија или сезонското афективно растројство е вид на депресија која доаѓа и заминува по сезонски модел, а почесто се јавува во зима. Симптомите вклучуваат постојано лошо расположение, екстремен замор и повлекување од социјалните активности, пишува „Гардијан“.

Совети од м-р Тиана Ивановска, психолог: Празниците често се тригер за тага