Американскиот Сенат ја потврди номинацијата на Каш Пател – еден од најголемите сојузници и поддржувачи на американскиот претседател Доналд Трамп – за позицијата директор на ФБИ. Неговата номинација беше одобрена со партиско мнозинство од 51 наспроти 49. Против назначувањето на Каш Пател беа демократите и две републиканки – Сузан Колинс од Мејн и Лиза Мурковски од Алјаска – кои гласаа против кандидатот на Трамп.

Всушност, Колинс го наведе фактот дека неговите изјави и постапки „создаваат сомнежи за г. Пател да ја унапреди мисијата за спроведување на законот без политички мотивации“, додека Мурковски истакна дека нејзиното противење „потекнува од неговите минати политички активности и како тие би можеле да влијаат на неговото раководство“. „Мора да му се верува на ФБИ како федерална агенција која го искоренува криминалот и корупцијата и не е фокусирана на расчистување на политичките сметки“, нагласи таа.

– Чест ми е што сум потврден како деветти директор на Федералното биро за истраги – напиша Пател на Икс, набргу откако беше потврден од Сенатот.

– Мојата мисија како директор е јасна: добрите полицајци нека бидат полицајци – и повторно изградете ја довербата во ФБИ. Ќе го обновиме ФБИ со кој американскиот народ може да се гордее – додаде тој.

Неговата изјава е слична на онаа што ја даде во 2024 година на поткаст пред да биде назначен од Трамп за највисоката позиција во ФБИ.

– Ги земам 7.000-те вработени што работат во таа зграда и ги испраќам низ Америка да ги бркаат криминалците. Бидете полицајци – рече тогаш Пател.

Каш Пател доаѓа на местото на Кристофер Вреј, кој Трамп го избра во 2017 година. Вреј поднесе оставка пред инаугурацијата на Трамп минатиот месец, откако новоизбраниот републикански претседател најави дека ќе го смени.

Син на емигранти, лојален на Трамп

Роден во Њујорк, Кашјап, „Кеш“ Пател е син на индиски имигранти што мигрирале во САД во 1970-тите. Пораснат во духот на хинду религијата, Пател рече дека неговото воспитување во населбата Квинс било типично за повеќето Американци.

– Моите родители не се богати или славни. Тие се само имигранти од работничката класа од Индија – напиша Пател во книгата од 2023 година.
– Моите најголеми спомени како дете се одењето во Дизни Ворлд и хокеј натпреварите, речиси онолку колку што може да добие „милкетост Американа“ – тврди ненаметливиот и кроток Американец.

Следејќи го правото, Пател работеше девет години како јавен бранител во Флорида, пред да биде ангажиран од Министерството за правда како обвинител за тероризам во 2013 година.

– Пател зборуваше за неговата желба да спроведе големи промени во ФБИ, вклучително и намален отпечаток во Вашингтон и обновен акцент на традиционалните должности на бирото за борба против криминалот, наместо работата на собирање разузнавачки информации што дојде до тоа да го дефинира својот мандат во текот на изминатите две децении како што се намножуваа заканите по националната безбедност – пишува Асошиетед прес (АП).

Американските медиуми за Пател пишуваат дека е лојалист на Трамп, кој жестоко ја критикуваше агенцијата што сега ќе ја води. Пател ќе го наследи Федералното биро за истраги (ФБИ) зафатено од превирања бидејќи Министерството за правда во текот на изминатиот месец принуди група од 8 високи функционери на бирото да поднесат оставки од своите позиции или ќе се соочат со отказ и направи многу невообичаено барање за имињата на илјадници агенти кои учествуваа во истрагите поврзани со немирите на 6 јануари 2021 година.

Разрешените функционери ги надгледуваа одделите за национална безбедност, кривичната правда и сајбер на бирото. Дополнително, заменик-јавниот обвинител Емил Бове му нареди на Брајан Дрискол – кој ја извршуваше функцијата вршител на должноста директор на ФБИ до назначувањето на Пател – да состави список на сите сегашни и поранешни вработени во ФБИ кои биле доделени во истрагата за упадот на Капитол на 6 јануари 2021 година, да бидат разгледани „за да се утврди дали се потребни дополнителни дејства“, потсети Си-би-си Њуз.

ФБИ минатата недела го предаде списокот со повеќе од 5.000 вработени што работеа на случаите од 6 јануари, а подоцна нареди да бидат именувани вработените.
Ова предизвика загриженост кај вработените што работеа на истрагата за упад во Капитол хил дека нивните имиња би можеле да бидат јавно објавени, но Пател вети за време на неговото сослушување дека „сите вработени во ФБИ ќе бидат заштитени од политичка одмазда“.

Автор на детски книги и љубител на заговори

Во 2022 година Пател почна да издава книги за деца под наслов „Заговор против кралот“, во кои преовладува алузија за администрацијата на Трамп и неговите критичари и во која Хилари Клинтон е претставена како злобница.

Четириесет и четиригодишниот Пател е член на бордот на „Трамп медија технолоџи груп“, компанијата што ја основаше платформата „Трут сошал“. Пател даваше и јавни коментари за КАнон (QUnon) – онлајн движењето на љубители на теории на заговори чии следачи веруваат дека Трамп води тајна војна против корумпираната елита на злоставувачи на деца вклучително и делот од владата наречен „длабока држава“ и познати личности од А-листата.

Во едно интервју во 2022 година Пател зборуваше за конспиративното движење нагласувајќи дека со некои ставови се согласува, а со некои не, додека во друг поткаст истата година рече дека ги користел теориите на заговор како промотивна тактика и дека таму луѓето се забавуваат.

– Ние се обидуваме да го вклучиме во нашата севкупна шема за пораки за да ја привлечеме публиката, бидејќи која и да е таа личност, секако, вдишала длабоко од здивот на МАГА и движењето „Америка прво“.

На сослушувањето пред гласањето во Сенатот на 20 јануари, Пател негираше дека го привлекуваат теории на заговор.

Доналд Трамп кратко по негов избор за претседател на САД уште во декември минатата година најави дека ќе го назначи Каш Пател за директор на ФБИ и тогаш предизвика бурни реакции, главно кај Демократската партија.

Пател (44), поранешен службеник во разузнавањето и одбраната за време на првиот мандат на Трамп, е контроверзна личност, дури и во најблискиот круг на Трамп.

Поранешен американски функционер го опиша како „најопасниот избор“ што го направил претседателот, изјавувајќи дека не постои „таван“ за Пател, кој „може сè“, изјави тој за Си-би-ес њуз. Поранешниот советник за национална безбедност Џон Болтон, кој служеше под Трамп и му беше шеф на Пател, го спореди назначувањето со шефот на тајната полиција на Јосиф Сталин, додавајќи дека Сенатот треба да го отфрли овој избор со „100-0“. Како одговор, новоизбраниот потпретседател Џеј-Ди Венс ги нарече изјавите на Болтон „погрешни“, додавајќи дека Пател можеби е „прилично страшен“.

Трамп, пак, во својата објава, го опиша Пател како „брилијантен адвокат“ и „Прв борец за Америка“, истакнувајќи го неговото искуство во борбата против корупцијата и одбраната на правдата.