Професор доктор Иван Барбов долгогодишен невролог специјалист, денеска е разрешен од раководител на одделението за невромускулни заболувања на државната Клиника за неврологија и поставен за обичен невролог на оддел за паркинсонова болест од страна на директорот и поранешен министер за здравство Фатмир Меџити.

Доктор Барбов одбил да го прими решението за прераспределување после што му било кажано дека ќе се објави на огласна табла. Тој смета дека е понижувачки и за струката и за пациентите тоа што ќе биде отстранет од оддел за кој е стручен и ќе биде прераспределен во оддел каде никогаш не работел со материја што исто така никогаш не ја работел.

На одделот каде Барбов бил раководител, се третираат пациенти со невромускулни и ретки болести и бара голема стручност. Професорот за „Слободен печат“ тврди дека изминатиот период е предмет на бројни притисоци, а имало покренато и дисциплинска постапка непосредно пред да биде разрешен.