Сообраќајот на државните патишта во земјава се одвива непречено, по претежно суви коловози, а интензитетот надвор од градските средини е умерен, информира Автомотосојузот на Македонија (АМСМ).

Според АМСМ, од 11 часот целосно е блокиран сообраќајот за влез и излез на граничниот премин Евзони. На граничниот премин Ники (Меџитлија) сообраќајот е блокиран за товарни возила и автобуси, додека за другите возила се одвива нормално. На ГП Дојран сообраќајот тече непречено, но поради зголемен интензитет се очекуваат повремени задржувања при влез во државата.

Времето на чекање за излез од државата на ГП Дојран изнесува околу 30 минути, додека на граничниот премин Табановце за излез се чека околу 40 минути. На останатите гранични премини од македонска страна нема подолги задржувања.

АМСМ препорачува прилагодена брзина на движење, почитување на сообраќајната сигнализација и внимателно управување со возилата, особено на патиштата низ котлините, речните долини и клисурите, каде што постои можност од одрони. Особена внимателност се советува на делниците Катланово – Велес, Маврово – Дебар – Струга, Виница – Берово и Кочани – Делчево.