Денес беа евакуирани 148 лица вклучувајќи 34 деца од автопат завеан со снег во регионот Саратов. Ова го соопшти регионалниот гувернер Роман Бусаргин, кој додаде дека работата на уште девет патни делници е веќе завршена, а пристапот е обезбеден- пренесе Риа новости.

„Поради снежните наноси и сообраќајните несреќи, ограничувањата остануваат на делови од шест федерални автопати во областите Јершовски, Енгелс, Советски, Хвалински и Пугачевски. Специјалисти и опрема од спасувачката служба работат на секој од нив. Граѓаните се евакуираат во центри за привремено сместување со нивна согласност, а организирани се и испораки на бензин- напиша тој на својот канал Телеграм.

Мобилна единица со тешка опрема од регионалната спасувачка служба работи на најпредизвикувачките делови. Далноводите во 205 населени места беа оштетени поради силни ветрови и паднати дрвја. Електричарите работат на поправки, со вкупно 59 екипи. Евидентирани се оштетувања на покривите, вклучително и во неколку училишта, болници и станбени згради, појасни гувернерот.

Службите за итни случаи и вонредни ситуации, како и владините агенции на сите нивоа, продолжуваат да работат деноноќно за да се справат со последиците од бурата. Вчера Саратовската област доживеа обилни снежни врнежи и силен ветер со налети до 25-27 метри во секунда. Сите служби за итни случаи и комунални услуги работат во засилен режим. Ограничувања за камиони и автобуси се воведени на пет федерални автопати во регионот поради снежна бура.