Јавното претпријатие за државни патишта и Европската банка за обнова и развој (ЕБОР) потпишаа договор за грант и заем за изградба на автопатот Скопје – Блаце. Проектот вреди 198,4 милиони евра, од кои 30,8 милиони се грант од Инвестициската рамка на ЕУ за Западен Балкан, а 167,6 милиони евра се кредит.

Автопатот ќе биде долг околу 12 километри (вклучувајќи претходно изграден дел), со сложена траса низ ридско-планински терен на Скопска Црна Гора. Предвидени се пет тунели со две цевки, девет мостови, повеќе потпатници, галерии и потпорни ѕидови. Изградбата треба да почне во август, а рокот за завршување е околу четири години.

Проектот беше претставен како клучен за регионално поврзување со Косово и економски развој. Владата најави дека паралелно ќе се реализираат и други автопатски делници низ државата.