Во Офицерскиот дом во Битола, на 23 ноември, ќе се одржи Саем на креативни индустрии под покровителство на Министерството за култура на РСМ. На саемот ќе се претстават 20-тина изложувачи кои се дел од креативниот сектор од Битола и пошироко.

Посетителите ќе имаат шанса да видат и доживеат аугментирана реалност, рачно цртани парчиња облека, копаничарство, уникатни парчиња накит, издаваштво, сликарство, еколошки производи, детски играчки, роботика, дигитален маркетинг, лампи од реупотребени материјали, улична уметност и илустрации, „слоу фуд“ или „нова гастрономија“ посветена на традиционалната храна, локалните ресурси и новите технологии, „слоу фешн“ итн.

Станува збор за втор настан во рамките на месец ноември во кој се слави креативноста и креативните индустрии во организација на здружението „Балкан синема ситис“. Првиот Саем за креативни индустрии беше одржан на почетокот на месецов во Скопје и истиот обедини повеќе од 40 изложувачи.

Соединувањето на цела инфраструктура сочинета од дизајнери, уметници и водечки организации е иницијатива која има за цел да го подигне профилот на креативниот сектор, да ги поврзе организациите кои имаат заеднички интерес во креативните индустрии и да ги обедини сите креативци без оглед од кој сегмент на креативните индустрии доаѓаат.

Саемот се одржува под мотото „Креативноста е заразна. Дојди зарази се“, а работното време е од 11 до 19 часот.