Бугарскиот европратеник Ангел Џамбаски во објава на Фејсбук ги обвини бугарските политички партии кои имаат пратеници во актуелниот бугарски парламент дека дозволиле легитимирање на, како што вели, „лагата македонски јазик“ по посетата на претседателката на Европската комисија Урсула фон дер Лајен, откако претходно го коментираше отворањето на македонскиот клуб „Никола Вапцаров“ во Благоевград прашувајќи: „Се подготвува ли македонска провокација во Пиринска Македонија?“.

Пратениците во бугарскиот парламент, според него, ги „отпишале“ бугарската историја, јазик и култура. Тој ги нападна партиите ДПС, ГЕРБ, Продолжуваме со промените и Демократска Бугарија поради потпишувањето на договорот за Фронтекс меѓу ЕУ и Северна Македонија.

„Вчера Урсула фон дер Лајен и Димитар Ковачевски потпишаа договор за управување со границите. Се потпиша и на ‘македонски’, без фусноти, без посебни мислења. Ова го потенцира и претседателката на ЕК дека договорот е потпишан на македонски, како што вети“, вели Џамбаски во објавата.

Македонците, како што вели, сега слават поради неуспехот и нихилизмот на овие 170 претставници.

„Браво Борисов, Петков, Иванов и Карадај. Влеговте во историјата, покрај Георги Димитров, Кимон Георгиев, Трајчо Костов и другата комунистичка ништожност. Тие, како тебе, направија се за да им угодат на странските господари и да ја пречкртаат светата кауза на Бугарите со генерации – Македонија. Не е изненадување. Вие сте нивни достојни наследници и проекции. Срам и срам што дозволивте Македонците да се гостат на сметка на бугарската чест и достоинство. Плукате по случајот на Климент Охридски, браќата Миладиновци, проф. Лубомир Милетиќ и сите познати и непознати Бугари кои придонеле за развојот на бугарската култура и јазик, кој веројатно наскоро ќе испадне жмакедонскиж. Засекогаш ќе владее срамот над предавниците на бугарската кауза!“, напиша Џамбаски.

Вчера пак, на социјалните мрежи го коментираше и отворањето на македонскиот клуб „Никола Вапцаров“ во Благоевград.

„Предвидено е отворање на македонски културен клуб ‘Никола Вапцаров’ во Благоевград. А на отворањето најверојатно ќе се појави бугаромразецот, расипникот на дивиот антибугарски македонизам, Христијан Мицкоски. Неприфатливо е лице кое користи јазик на омраза против Бугарија и Бугарите, лице кое го нарекува Договорот за соседство ‘отровно овошје‘, го негира постоењето на бугарска заедница во Северна Македонија и е против нејзино вклучување во Уставот како рамноправен легитимен дел од северномакедонското општество да дојде во Пиринска Македонија и да сее сепаратизам и омраза“, вели Џамбаски.

Тој уште очекува јасни конкретни одговори од кабинетот на техничкиот премиер на Бугарија, Галаб Донев на прашањата: Кој е имотот и кој ќе ги администрира активностите на Македонскиот културен клуб „Никола Вапцаров“? Дали има доставени информации и барање од официјалните власти на Северна Македонија за отворање културен клуб во Благоевград? Дали е вистина дека во организацијата на Македонскиот културен центар учествуваат лица поврзани со „сепаратистичките организации“ ОМО Илинден и ОМО Илинден – Пирин.

-Недозволиво е да се отвора клуб во срцето на Пиринска Македонија за да сее сепратизам и антибугарски тези, додава Џамбаски.