Двегодишниот Лав од Нови Сад го прими најскапиот лек на светот, чини 2,5 милиони евра
Двегодишниот Лав Тодоровиќ од Нови Сад, кој боледува од спинална мускулна атрофија (СМА) тип 1, прв во Србија ја прими генетската терапија золгенсма на Универзитетската детска клиника во Тиршова, јавија српските медиуми.
Малиот Лав завчера бил примен на одделението, а вчера го примил најскапиот лек на светот, кој чини дури 2,5 милиони евра, на државен трошок.
Директорката на РФЗО, Сања Радојевиќ Шкодриќ рекла дека вчера за првпат е дадена најновата генетска терапија за СМА и дека од вчера секое дете што ги исполнува критериумите, а боледува од спинална мускулна атрофија, ќе може во Србија да го прими најскапиот лек во светот.
Во Србија првпат се применува оваа скапа генетска терапија. Досега децата кои боледуваат од СМА оделе на лекување во САД или Унгарија.
– Во болница остануваме уште неколку дена – со возбуден глас раскажала мајката на малиот Лав за „Новости“, додавајќи дека утрово биле направени подготовките, а примањето терапија траело еден час.
„Сега лекарите ќе ја следат состојбата по примањето на лекот, но се надевам дека наскоро ќе си одиме дома.“
Детската клиника во Белград е сертифицирана да ја дава терапијата со золгенсма, а Лав пред неколку месеци бил на преглед каде што било докажано дека тој е одличен кандидат за оваа генетска терапија.
Кога се појави на пазарот, золгенсма чинеше 2,5 милиони долари. Денес чини 1,7 милиони евра за пациентите кои го примаат во Унгарија.
