По неполни два дена расправа, пратениците го изгласаа буџетот за 2026, со 71 глас за и 17 против.

Се планира во државната каса да се приберат околу 6,1 милијарда евра, а да се потрошат 6,7 милијарди. Буџетскиот дефицит е проектиран на 3,5 проценти од БДП.

Владата очекува инфлацијата догодина да се намали на 2,5 проценти, а буџетот е проектиран врз раст на економијата од 3,8 проценти. Капиталните инвестиции се планирани на 650 милиони евра. За власта, буџетот е реален и развоен – се фокусира на забрзан економски раст и на постепено намалување на задолжувањата.

Главен двигател на растот ќе бидат инвестициите и приватната потрошувачка. За опозицијата буџетот е нереален, неразвоен и социјален. Според пратениците од СДСМ кои дебатираа во Собранието, растот е нереален, многу повисок од очекувањата на меѓународните институции, што ќе доведе до поголеми задолжувања и помали капитални инвестиции.

Од над 200 поднесени амандмани, прифатени беа само шест. Буџетскиот дефицит е планиран на 638 милиони евра, додека за капитални инвестиции се проектирани 658 милиони евра.