Авион на компанијата „Визер“ кој попладнево летал од Дортмунд кон Охрид, нагло го сменил правецот додека бил над Хрватска, а пилотот испратил сигнал за итна ситуација или тревога, покажуваат податоците на веб-страницата за следење летови „Флајтрадар“.

Авионот слетал во Охрид со задоцнување од два часа.

Роднини на патници кои биле на летот велат дека им било кажано оти станува збор за итна здравствена ситуација, односно дека пилотот, откако му се слошило на еден патник, побарал да слета на најблискиот аеродром – во Венеција.

Македонските воздухопловни власти велат дека со оглед на тоа дека ова се случило во туѓ воздушен простор, немаат официјално известување за настанот, но и дека компанијата нема обврска да ги извести.

Од „Визер“ досега официјално не се огласија за случајот – компанијата само постави објава на Твитер во која се вели дека авионот слетал во Охрид.