Сеопфатен преглед на изборното законодавство, повеќе напори во областа на владеење на правото, вклучувајќи ја и борбата против корупцијата, особено високата, и организираниот криминал, зајакнување на слободата на медиумите и слободата на изразување, реформа на јавната администрација… се дел од пораките во предлог-заклучоците на Советот за општи работи на ЕУ што ќе се одржи утре, а до кои дојде „Слободен печат“.

За разлика од претходниот Совет во јуни кога во однос на „последниот развој околу дискусиите меѓу Бугарија и Северна Македонија“ беше упатен повик за „брзо решавање на последните преостанати прашања за да може пристапните преговори да бидат отворени без одлагање“, овој пат во заклучоците Бугарија не е спомната, но договорот со неа го има во делот за добрососедски односи и регионална соработка.

„Добрососедските односи и регионалната соработка остануваат суштински елементи на процесот на проширување, исто како и Процесот за стабилизација и асоцијација. Советот ја повторува важноста на постигнувањето видливи резултати и спроведување на билатералните договори со добра волја од сите страни“, пишува во предлог-заклучоците.

Претходно во текстот се напоменува дека мора да се избегнуваат изјави и активности што негативно влијаат врз добрососедските односи и на мирното решавање на споровите, а постојните билатерални договори, вклучувајќи го Договорот од Преспа и Договорот за пријателство со Бугарија, треба да се спроведат со добра волја.

Во првата точка за Македонија по поздравувањето на почетокот на преговарачкиот процес и признавањето на напредокот во однос на агендата на ЕУ, како и скринингот, се нагласува потребата од сеопфатен преглед на изборното законодавство и за исполнување на препораките од ОБСЕ/ОДИХР и од Венециската комисија.

Во делот владеење на правото се нотира „одреден напредок“, исто како и за борбата против корупцијата и организираниот криминал, но се нагласува дека се потребни поголеми напори. Се поздравува посветеноста на Владата за одржлива и забрзана имплементација на реформите што се однесуваат на ЕУ, но се потсетува дека одржливоста на овие структурни реформи е долгорочен процес, кој бара постојан ангажман и од власта и од опозицијата.

„Советот ги охрабрува сите партии во Собранието да продолжат да работат заедно конструктивно и да изградат консензус за конкретните чекори во преговарачкиот процес и одржувањето на сегашниот реформски момент. Советот ја нагласува потребата од транспарентност во креирањето политики, инклузивност во процесот на консултации и ефикасна комуникација за преговарачкиот процес“, порачува Советот.

Во предлог-заклучоците како проактивна се оценува работата на Антикорупциската комисија, која отвори предмети и за висока корупција и се повикуваат соодветните институции да ги следат нејзините препораки.

Во областа на реформата на јавната администрација се нотира ограничен напредок и како суштинско се бара почитување на начелата на транспарентност, мерит-систем и правична застапеност. Исто така, се додава дека е неопходно зајакнување на парламентарната контрола на разузнавачките и на безбедносните служби.

Иако не се споменуваат конкретни земји, во текстот на предлог-заклучоците Советот ја нагласува потребата Северна Македонија да се усогласи со визната политика на ЕУ.