До ЕУ нема краток пат и тоа треба да се знае. Потребни се вистински заложби, отчетност и транспарентност, а сето тоа носи корист за граѓаните кога ќе се спроведат реформите, порача шведската амбасадорка во земјава, Ами Ларсон Јаин во обраќањето на панел-дискусија за Преспа форум дијалог 2023, насловена „Патот кон 2030“.

– Патот беше долг и трнлив и некои се прашуваат дали Северна Македонија некогаш ќе стане членка на ЕУ. Северна Македонија убаво го почна скринингот, интеграцијата во ЕУ е стратешка цел на земјата, рече Ларсон Јаин.

Како одговор на прашањето дали целта за членство во ЕУ до 2030 година е остварлива, порача дека тоа зависи од нас и колку ќе се трудиме да ги направиме фундаменталните промени.

Според неа, за да се стигне до членство во ЕУ, борбата против корупцијата и владеењето на правото се основните вредности.

– Треба вистински заложби, потребни се отчетност и транспарентност, но сето тоа носи и корист за граѓаните кога ќе се спроведат реформите. Неопходен е сеопфатен пристап во општеството, додаде амбасадорката.

Како најголеми проблеми ги наведе сиромаштијата, нискиот стандард, корупцијата и криминалот.

– Корупцијата е корозивна за општеството, ја ослабува демократијата и ја поткопува довербата во институциите, се заканува на функционирањето на демократските институции, а губат и граѓаните и бизнисот, изјави Ларсон Јаин.

Во однос на уставните измени, индиректно порача дека треба да се усвојат, бидејќи сега е силен моментумот за проширување на Унијата.

– Моментумот е вреден. Кога го имате го користите, вели Ларсон Јаин.

На панел-дискусијата со претставници на граѓанското општество и тинк-тенкови од Балканот и пошироко коишто активно ја следат политиката на проширување на Европската унија учествува и вицепремиерот за европски прашања Бојан Маричиќ.