Дискографската куќа „Корпус деликти рекордс“ најавува две нови компилациски плочи

Музичкиот новинар и хроничар Тошо Филиповски го најави својот нов проект, изработка на две компилациски лонг-плеј плочи како дел од едицијата „Македонски рок архив“. Издавач е дискографската куќа „Корпус деликти рекордс“, која планира да ги објави и двете компилации. И двете содржат моќни имиња од македонската рок-сцена.

На првата компилација, „Macedonian new wave vol.2 1979-1987“ се наоѓаат песни од групите „Инола икс“, „Зијан“, „Бастион“, „Дизајн“, „Фора“, „Прамен“, „Гино Де Гаги и нивните страсти“, „Меморија“, „Бон-тон“, „Морал“, „Чуден крој“, „Телекс“, „Токму така“ и „Коцка мраз“.

Другата компилација е ЛП со налов „Macedonian Dark wave vol.1 1985-1989“. На неа фигурираат групите „Апореа“, „Падот на Византија“, „Мизар“, „Клеопатра“, „Ден потоа“, „Берза“, „Анастасија“, „Тело-наука совршена“ и „Наумахија“.

Лонг-плејките официјално ќе бидат пуштени во промет на 23 април, во планиран тираж од 200 примероци. Дизајнот е на Бојан Ивановиќ. Пристапот е класичен, со лонг-плејки, што е од особено значење со оглед на тоа што плочите како формат веќе не важат само за носачи на звук, туку се реткост и нешто што љубителите на музика со страст го колекционираат.

– Пријатели, поддржувачи, музичари, почитувачи на сопствената музичка историја, чувари на културното богатство.. Вие сте на потег! – напиша Филиповски на својот Фејсбук-профил, каде може предвреме да се нарача примерок од компилациите.

Инаку, Тошо Филиповски е познат собирач на музички артефакти. Воден е од идејата дека во нашата држава има огромно музичко богатство што мора да биде ставено во некакви рамки. Резултат на неговата визија е првата „Македонска рок енциклопедија“, што ја издаде по 20 години истражување и макотрпно собирање на информации за настани и луѓе кои ја дефинирале македонската рок-сцена.

По рок-енциклопедијата ги објави и монографските книги „Македонска дискографија – Винили 1958-2019“ и „Македонски рок-времеплов“, а негова долгогодишна желба е создавање музеј на македонската рок-музика.

Видео на денот