Директорот на Клиника за неврологија позитивен на Ковид 19
Директорот на Клиниката за неврологија, доктор Иван Барбов е позитивен на коронавирусот и е во изолација. Тој за „Слободен печат“ тврди дека се тестирал со ПЦР метода во Институтот за јавно здравје, поради контакт со повеќе позитивни пациенти кои ги прегледувал изминатите денови.
– Да не направев тест немаше да знам воопшто бидејќи немам никакви симптоми. Веќе доставив список на моите контакти но сите биле со заштита и претежно на работното место каде постојано носиме заштита, ни рече докторот.
Тој од вчера е во домашна самоизолација.
– Во изминативе 4 месеци секојдневно бев на работа, не се поштедив со ротации. Се со цел подобро да ја организирам работата на клиниката и да бидам достапен за сите пациенти. Постојано носев маска на работа и надвор во затворени простории. Почитувајте ги препораките и чувајте се- порачува директорот на Клиниката за неврологија, доктор Иван Барбов.