Денеска во полуфиналниот натпревар на ФИБА „Челенџер“ за играчи „Под 20“ години македонската младинска репрезентација во Шопрон загуби со дури 55 коша разлика од домаќинот Унгарија со 99:44.

После двете победи над Луксембург и Романија и поразот од Швајцарија во групната фаза, избраниците на селекторот Тони Симиќ се најдоа во полуфиналето каде што доста убедливо беа надиграни.

Унгарците в недела од 19.30 часот против Белорусија ќе одлучуваат која ќе биде најдобрата селекција во „Д“ групата од ова новоформирано натпреварување на ФИБА.

А претходно од 16.30 часот Македонија за третото место ќе игра против Швајцарците од кои загубија во групната фаза со 65:79.

На денешниот меч домаќинот силно стартуваше, веќе стекна голема позитива (29:10) и брзо го скршија отпорот на нашите надежи. А по 20 минути водеа со недостижни (41:17) и тоа беше најава дека се промовираат како финалисти на овој турнир.

Во првиот дел поентираа само тројца наши кошаркари. Димитровски имаше осум поени, Иванов шест, а Исајлоски уште три поени – премалку за некои поголеми очекувања. За доминацијата на Унгарија на оваа средба сведочи уште еден податок, ривалот имаше дури 37 скока, а ние 14.

Сето тоа беше доволно „причина“ за селекторот Симиќ во игра да ви внесе и играчите кои досега немаа преголем број на минути на турнирот, како Ѓорѓиев, Мирковски и Груевски.

Кај стрелците во нашите редови најрасположен беше Љубиша Димитровски со 18 поени (девет скокови), а кај противникот 15 поени беа дело на Тамас Ото Палаи.