Данскиот министер за надворешни работи Ларс Локе Расмусен изјави дека верува оти САД веројатно разгледуваат обид за преземање на Гренланд, вклучително и можноста за купување на островот, објави Фокс њуз.

Во едно интервју, тој нагласи дека иако е можно Вашингтон да се обиде да покрене таква иницијатива, не верува дека Гренланд ќе учествува во неа. Како аргумент, тој ги наведе резултатите од неодамнешните анкети, според кои само околу шест проценти од островјаните ја поддржуваат идејата да станат американски граѓани.

„Сосема е можно САД да се обидат да го сторат ова. Но, невозможно е Гренланд да поверува во сето ова. Според неодамнешните анкети во Гренланд, само шест проценти од населението сакаат да станат Американци“, рече Расмусен.

Во исто време, данскиот министер предупреди дека евентуалната инвазија на Гренланд од страна на САД би имала далекусежни последици за евроатлантската безбедност и би го означила крајот на пактот на НАТО.

„Се надевам дека ова нема да се случи. Тоа би бил крај на НАТО“, рече Расмусен, одговарајќи на прашањето дали верува дека американската воена интервенција на островот е реална можност.