Судскиот процес против Стојанче Јовановски, обвинет за наведување на самоубиство на Ивана, продолжува со прашања од Стојанче до сведокот Мартин Саздов.

-Дали заедно со Ивана правевте план како да се ослободите од мене? – праша Стојанче, а сведокот одговори потврдно.

Стојанче го праша Саздов и дали „постојано ја присилувал неговата сопруга Ивана да се дрогира и да биде заедно со него“.

-Јас никогаш не сум ја присилувал Ивана на такво нешто. Ивана ми кажуваше дека Стојанче ја терал да се дрогира кога доаѓал дома дрогиран и ја тепал. Јас ѝ се лутев зошто прави такво нешто, но таа рече дека мора да биде добра со него за да ѝ го врати станот – рече Саздов.

На прашањето на Стојанче дали Саздов ја присилувал Ивана на интимни односи и да се снимаат, тој категорично одговори дека никогаш не сторил такво нешто.

„Дали знаеш дека мојот телефон беше спарен со телефонот на Ивана и јас ја знам целата вистина во врска со тоа што планиравте да ми го направите и да се ослободите од мене?“, праша Стојанче Јовановски, на што сведокот рече дека сака тоа да се докаже и Стојанче да ги приложи тие докази.

Сведокот Саздов истакна дека кога таткото на Ивана починал, коментарот на обвинетиот Стојанче бил дека „таму му е местото“. Рече и дека еден ден Ивана му ги побарала нивните интимни видеа, со образложение дека многу ѝ се потребни – а потоа дознал дека Стојанче ја присилувал да ја прати таквата порака.

-Откако ѝ ги пратив на Ивана нашите видеа, таа ми кажа дека Стојанче ја уценува со видеата, дека ќе ги покаже на нејзините родители, дека ќе ја прогласат за неморална жена, а од тоа многу се плашеше – рече сведокот.