Цртежи и колажи на Јана Манева-Чупоска се изложени во Националниот музеј на Војводина во Нови Сад
Изложбата на цртежи и колажи со наслов „Љубовници во пандемија“ на Јана Манева-Чупоска од 22 октомври е поставена во Националниот музеј на Војводина во Нови Сад, Република Србија. Изложбата се состои од четириесет дела изработени во комбинирана техника: молив, јаглен, акрил и темпера.
Авторката е инспирирана од актуелната состојба со пандемијата на коронавирусот, што во негативна насока целосно го промени начинот на животот кај луѓето. Насловот има алегорична конотација и алудира на надежта и потребата за враќање на животот во нормална насока.
Преку фигуративните композициски ликовни претстави, ликовната уметница ја пренесува нејзината психолошка и емотивна состојба во времето на корона-кризата. Таа љубовта ја нагласува како ликовен симбол, кој во овие дела дава надеж дека, сепак, љубовта ќе го спаси човештвото.
Изложбата во Нови Сад е поддржана од Министерството за култура на Република Северна Македонија, како проект од национален интерес во ликовната дејност за 2021 година.
(Текстот е објавен во „Културен печат“ број 102, во печатеното издание на весникот „Слободен печат“ на 23-24 октомври 2021)