Македонскиот претставник во ФИБА Европа купот, Пелистер, го запиша и третиот пораз во групната фаза, откако вечерва на домашен терен беше совладан од хрватската Цедевита Јуниор со убедливи 74:95.

По овој резултат, битолскиот состав останува закован на последното место во групата, а шансите за пласман во топ-16 се сведени само на теорија. Во оваа фаза место обезбедуваат победниците на групите и шестте најдобри второпласирани екипи.

Пелистер одигра рамноправно само во третиот период, кога со серија од 11:0 ја анулира високата предност на гостите и успеа да израмни на 56:56. Сепак, Хрватите веднаш возвратија со брза серија од 12:2 и повторно се одлепија, поведувајќи со 68:58, а до крајот само ја зголемуваа разликата која достигна и 23 поени (91:68).

Во редовите на Пелистер најефикасен беше Дејвис со 21 поен, Вилсон уфрли 16, а Митревски 15. Разочара најдобриот стрелец на тимот, Остин Прајс, кој за речиси 20 минути игра постигна само два поени со шут 1/9.

Пелистер во следното коло ќе гостува на Приевидза, единствениот ривал кој го совлада досега во оваа сезона.

Преземено од: Спорт.ком.мк