Министерот за надворешни работи, Тимчо Муцунски, од Брисел преку социјалните мрежи реагира на изјавата на неговата нова бугарска колешка, Велислава Петрова Чамова, во која таа рече дека двајцата одржале билатерална средба. Муцунски сега вели дека не се одржал официјален состанок и посочува дека тоа што се случило било „кратка размена на зборови на маргините на настан“.

„Во однос на изјавата на мојата нова бугарска колешка, Велислава Петрова Чамова, би сакал да појаснам дека денес немавме официјална билатерална средба. Имавме кратка размена на зборови на маргините на настан, во присуство на повеќе колеги. Ако едноминутен разговор се нарекува „средба“, тогаш денес навистина имавме многу „средби“. Воедно, би сакал да потсетам дека користењето на терминот „северномакедонски“ за означување на македонскиот народ е неточно и несоодветно. Македонците се Македонци. Ова не е прашање на политика, туку на основно почитување на идентитетот и достоинството на еден народ“, вели Муцунски во објавата.

„Во дипломатијата, прецизноста не е формалност. Таа е одраз на почит. А, како што ѝ кажав на Велислава, се надевам дека наскоро навистина ќе одржиме средба – во пријателска и позитивна атмосфера, насочена кон градење добрососедски односи и нашата заедничка европска иднина“, додава министерот.