Велика Британија воведе санкции против руските научници вклучени во развојот на нервниот агенс „новичок“. Министерството за надворешни работи објави дека новите мерки се насочени кон оние кои се вклучени во создавањето на хемиското оружје што се користело во нападот во Солсбери и токсинот што се користел за труење на рускиот опозициски лидер Алексеј Навални, објави „Телеграф“.

Санкциите, кои вклучуваат замрзнување на средства и забрани за патување, беа воведени врз седум лица и две научни институции. Министерството за надворешни работи вели дека лицата на кои им се изречени санкции биле вклучени во создавањето на „новичок“, употребен во обидот за атентат врз поранешниот советски шпион Сергеј Скрипал и неговата ќерка Јулија во 2018 година, и токсинот епибатидин, кој беше употребен за труење на Навални.

Во нападот во Солсбери, почина британската државјанка Дон Стерџис откако дојде во контакт со отровот.

Министерката за надворешни работи Ивет Купер изјави дека повеќекратната употреба на хемиско оружје од страна на Русија е флагрантно кршење на меѓународното право и директна закана за глобалната безбедност.

„Од употребата на нервниот агенс ‘новичок’ во Солсбери до епибатидинот во Сибир, од труењето на Дон Стерџис до Алексеј Навални, Русија продолжи да користи варварски средства за да сее смрт и страдање меѓу невините цивили, вклучително и во Украина. Ќе продолжиме да ја критикуваме Русија за кршење на Конвенцијата за хемиско оружје, ќе инсистираме на тоа одговорните да бидат повикани на одговорност и ќе работиме со сојузниците за да ја спречиме понатамошната употреба на ова опасно оружје“, рече Купер.

Путин стои зад труењето на Скрипал и неговата ќерка во 2018 година, заклучува британската истрага