Македонската фудбалска А репрезентација во полуфиналето на мундијалскиот бараж за противник ја доби селекцијата на Данска против која ќе игра на гостински терен на 26 март 2026 година.

Нашата најдобра селекција доколку ја победи Данска, во последната пречка повторно како гостин ќе игра против подобриот од пресметката меѓу Чешка и Република Ирска на 31 март 2026 година.

Данскиот селектор Брајан Ример истакна дека ждрепката во Цирих беше добра за неговата репрезентација:

– Сакавме да ја избегнеме Шведска, имаме историја со нив, и натпреварот ќе беше посебен. Малку проверив за Македонија и знаеме дека е балканска репрезентација која игра со срце. Ќе направиме подетална анализа. Тоа ќе биде процес во текот на следните неколку месеци, а кога ќе дојдат натпреварите во март, ќе знаеме малку за нив. Тоа е ждрепка што треба да ни обезбеди билет за Светското првенство. Тоа е нашата јасна цел и очекување. Чувствуваме дека сме на добро место и сме подготвени да се справиме со задачата – вели Ример за Ritzau.

Тој нагласува дека целиот фокус првично ќе биде на Македонија, но ќе има и анализа на репрезентациите на Чешка и Република Ирска.