Папата Лав XIV ги осуди условите за Палестинците во Газа во својата божиќна проповед денеска, во невообичаено директен апел за време на она што вообичаено е свечена, духовна служба на денот кога христијаните низ целиот свет го слават раѓањето на Исус, пренесува Ројтерс.

Лав, првиот американски папа, рече дека приказната за раѓањето на Исус во штала покажува дека Бог „го поставил својот кревок шатор“ меѓу луѓето во светот.

-Како тогаш да не помислиме на шаторите во Газа, изложени со недели на дожд, ветер и студ? – праша тој.

Лав XIV, славејќи го својот прв Божиќ откако беше избран во мај од светските кардинали да го наследи починатиот папа Франциск, има потивок, подипломатски стил од неговиот претходник и обично се воздржува од правење политички референци во своите проповеди.

Во подоцнежниот божиќен благослов, папата, кој ја направи грижата за имигрантите клучна тема на неговото рано папство, исто така се пожали на ситуацијата со мигрантите и бегалците кои „го преминуваат американскиот континент“.

Лав, кој во минатото ја критикуваше репресијата на американскиот претседател против имиграцијата, овојпат не го спомена Трамп. Во проповедта на Бадник во средата, папата рече дека одбивањето да им се помогне на сиромашните и странците е еднакво на отфрлање на самиот Бог.

Новиот папа неодамна неколку пати се жалеше на условите за Палестинците во Газа и минатиот месец им рече на новинарите дека единственото решение во деценискиот конфликт меѓу Израел и палестинскиот народ мора да вклучува палестинска држава.

Израел и Хамас се согласија на прекин на огнот во октомври по две години интензивно израелско бомбардирање и воени операции што следеа по смртоносниот напад на борците предводени од Хамас врз израелските заедници во октомври 2023 година. Хуманитарните агенции велат дека сè уште има премалку помош што влегува во Газа, каде што речиси целото население е бездомно.

На мисата во четвртокот пред илјадници католици собрани пред базиликата „Свети Петар“, Лав XIV, исто така, се жалеше на условите за бездомниците низ целиот свет и на уништувањето предизвикано од војната воопшто.

-Кршливо е месото на беспомошното население, искушено од толку многу војни, тековни или завршени, оставајќи зад себе урнатини и отворени рани – рече папата.

-Кршливи се умовите и животите на младите луѓе принудени да земат оружје, кои на фронтот ја чувствуваат бесмисленоста на она што се бара од нив и лагите што ги исполнуваат помпезните говори на оние што ги испраќаат во смрт – рече тој.

Во апелот за време на пораката и благословот „Urbi et Orbi“ (до градот и светот) што папата го даде за Божиќ и Велигден, Лав повика на крај на сите глобални војни.

Зборувајќи од централниот балкон на базиликата „Свети Петар“ пред илјадници луѓе на плоштадот подолу, тој ги оплакуваше конфликтите, политички, социјални или воени, во Украина, Судан, Мали, Мјанмар и Тајланд и Камбоџа, меѓу другите.
Лав рече дека луѓето во Украина, каде што руските трупи им се закануваат на градовите кои се критични за источната одбрана на земјата, се „измачени“ од насилство.