Адвокатите на Жаир Болсонаро вчера поднесоа жалба против пресудата на Врховниот суд на земјата, со која поранешниот бразилски претседател беше осуден на 27 години затвор за обид за државен удар за останување на власт по неговиот пораз од Луиз Инасио Лула да Силва на претседателските избори во 2022 година, пренесува Ле монд.

70-годишниот лидер на крајната десница беше осуден на 11 септември откако четворица од петте судии пресудија дека тој водел „криминална организација“ која заговарала за да обезбеди негово „авторитарно задржување на власт“.

Документите поднесени од правниот тим на Болсонаро, кои ги виде АФП, истакнуваат „пропусти, противречности и двосмислености“ во пресудата.

Врховниот суд на Бразил нема конкретен рок за одлучување по жалбата, но Болсонаро не може да биде затворен додека не ги исцрпи сите правни лекови што му се достапни.

Поранешниот бразилски претседател (2019-2022) е во домашен притвор од август.