Раководството на Барселона е задоволно од настапите што англискиот фудбалер Маркус Рашфорд ги прикажува оваа сезона и сериозно размислува на лето да го откупи од Манчестер јунајтед.

Рашфорд пристигна во редовите на шпанскиот шампион во август, на позајмица до крајот на сезоната, а брзо се вклопи во тимот и доби значајна улога во офанзивата.

Крилниот напаѓач досега има одиграно 23 натпревари за Барса, на кои постигна седум голови и забележа девет асистенции. Особено се истакна во периодот кога екипата речиси два месеци беше без повредениот Рафиња, преземајќи голем дел од одговорноста во нападот.

Шпанските медиуми пренесуваат дека челниците на клубот сè повеќе ја разгледуваат можноста да ја активираат откупната клаузула за Рашфорд, која изнесува 30 милиони евра.

Интересно е што Рашфорд не беше прва опција на Барселона во летниот преоден рок. Примарна цел тогаш бил Луис Дијаз, кој на крајот од Ливерпул се пресели во Баерн Минхен.