Бајиќ: Момците покажаа карактер, градиме стил на игра што ќе ја краси оваа репрезентација
Селекторот на „црвено-жолтите“ Драган Бајиќ смета дека резултатот не треба да биде пресуден на натпреварот против Шпанија, туку градењето на стил на игра која ќе ја краси македонската репрезентација во иднина.
Кошаркарската репрезентација на Македонија со пораз ги започна квалификациите за СП 2023 година. „Црвено-жолтите“ во премиерниот настап на едни мундијалски квалификациите во СЦ „Јане Сандански“ загубија од актуелниот светски шампион Шпанија со 65:94.
– Пред се сакам да и честитам на Шпанија за заслужената победа. Исто така благодарност до публиката што дојде во голем број за да не поддржи. Што се однесува до самиот натпревар, можам да бидам задоволен во голем дел од првото полувреме, но она што го најавив и пред натпреварот, Шпанците имаат квалитет и го докажаа тоа во вториот дел. Генерално сум задоволен од првото полувреме, освен тоа што го барав од играчите – дека не смееме да брзаме и да ја губиме главата во нападот. Секогаш кога тоа ќе се случеше, противникот ги казнуваше нашите грешки. Шпанија влезе уште поагресивно во одбраната во второто полувреме, изнудија бројни грешки и стигнаа до убедлива победа. Резултатот не е толку важен, овие момци што ги тренирам покажаа карактер, а некои работи и недостатоци не можеме да ги корегираме за така краток период. Битно е да почнеме да градиме стил на игра што ќе ја краси оваа репрезентација во наредните години, затоа велам дека резултатот не е пресуден – изјави Бајиќ.