Баерн вечерва од 21 часот ќе ја пречека Аталанта во реваншот од осминафиналето во Лигата на шампионите, а тренерот на баварскиот тим, Винсент Компани, има сериозни главоболки при составувањето на екипата.

Баерн првиот натпревар во Бергамо го доби со убедливи 6:1 и практично веќе обезбеди пласман во четвртфиналето, но најголем проблем за Компани претставува голманската позиција.

Повредени се тројцата први голмани Мануел Нојер, Свен Улрајх и Јонас Урбиг, како и голманот на У19 тимот Леон Кланац, што значи дека меѓу стативите би можел да застане 16-годишниот Леонард Прескот.

Прескот има 16 години и 176 дена и доколку навистина настапи, ќе стане најмладиот голман во историјата на Лигата на шампионите, уривајќи го рекордот на Мартен Вандевордт (17 години и 287 дена).

Сепак, за да може Прескот воопшто да биде во составот или на клупата воопшто, потребно е да помине и одредена процедура. Баерн најпрво мора да добие дозвола од државата, бидејќи според член 8(1) од германскиот Закон за заштита на младите, малолетни лица не смеат да работат по 20 часот. Со оглед на тоа што натпреварот почнува во 21 часот, Баерн веќе поднел барање за специјално изземање. Освен потписите од клубот и самиот Прескот, документот морале да го потпишат и двајцата негови родители и училиштето.

Но, дури и ако добие дозвола да биде на теренот или клупата во 21 часот, Прескот ќе мора да го напушти стадионот доколку натпреварот влезе во продолженија, бидејќи малолетници под никакви услови не смеат да работат по 23 часот. Сепак, такво нешто не е реално да се очекува бидејќи Баерн во првиот натпревар победи со 6-1.

Дополнително, законот предвидува и минимум 12 часа непрекинат одмор пред следното „работно време“, што значи дека Баерн би морал да ги оправда неговите часови во четврток, бидејќи тој нема да смее да оди на училиште.