Австралиски таксисти го тужеа Убер, сега ќе добијат 178 милиони долари
Убер се согласи да плати 271,8 милиони австралиски долари или 178,3 милиони американски долари, за да се реши тужбата во Австралија, соопшти денеска адвокатската канцеларија што ги застапува австралиските такси компании и нивните возачи.
Адвокатската фирма Морис Блекбурн поднесе колективна тужба во име на повеќе од 8.000 такси компании и таксисти. Во тужбата, тие тврдеа дека изгубиле приход кога гигантот за возачки услуги Убер „агресивно“ влезе на австралискиот пазар. „Убер се бореше со нокти и заби низ секој дел од процесот“, велат од адвокатската канцеларија.
„Од 2018 година, Убер направи значителен придонес во различни програми за компензација на таксиња ширум државата, а со денешното предложено решение, ги ставивме овие прашања во минатото“, се вели во соопштението за печатот на Убер.
Убер не го откри износот на предложената спогодба. „Би било несоодветно да се коментираат спецификите додека договорот не биде финализиран и спогодбата не се потврди на суд“, се вели во соопштението на Убер.
Групна тужба против Убер беше поднесена во 2019 година во Врховниот суд на австралиската држава Викторија. „Во овој случај успеавме таму каде што многу други не успеаја. Случаи беа покренати против владите во Викторија, Квинсленд и Западна Австралија и сите тие пропаднаа“, рече главниот адвокат на Морис Блекбурн, Мајкл Донели.
„Она што го бараа членовите на нашата група не беше уште едно во низата извинување, туку резултат. Ние им го доставивме тоа денес“, додаде тој. Пред да се изврши било каква исплата, судот сепак мора да ја одобри предложената спогодба дека е во најдобар интерес на членовите на класот.
Убер е со седиште во Сан Франциско, основана е во 2009 година и работи во околу 70 земји и повеќе од 10.000 градови низ светот. Со текот на годините, тој се соочуваше со протести од таксистите во градовите ширум светот.
Во декември 2023 година, компанијата победи во тужбата што ја покренаа 2.500 таксисти во Франција. Трговскиот суд во Париз пресуди дека Убер ги прекршил правилата за конкуренција. Француските таксисти побараа отштета од 455 милиони евра.