Градоначалничката на Скопје Данела Арсовска вечерва на прес-конференција кажа дека екипите на Град Скопје, јавните претпријатија и Противпожарната бригада соодветно реагирале по денешното невреме.

Таа рече дека скопските пожарникари со успешна интервенција успеале да спасат над 20 луѓе.

Арсовска попладнето свика итна седница на Кризниот штаб на терен, а според неа, главната причина поради која поголем дел од градот беше поплавен е атмосферската канализација, за која ги обвини нејзините претходници дека не ја решиле соодветно.

„Најголемиот предизвик беше поради атмосферската канализација која е несоодветна за она што во моментов го имаме во Скопје. Наредните денови ќе излеземе со анализа на кој начин ќе ги решиме овие предизвици. Има повеќе примери, дел од улиците се новоизградени и таму се појавуваат проблеми, а дел се реконструирани, но притоа не е направена реконструкција на атмосферската канализација“, рече Арсовска.