Археолошки локалитет Тумба Маџари: Виртуелна тура низ „Неолитско село“
Согласно здравствените препораки, „Неолитско село“ – музеј под отворено во археолошкиот локалитет Тумба Маџари во Скопје, сè уште е затворен за посета. Во интерес на заинтересираните посетители, Археолошкиот музеј овозможи кратка виртуелна тура низ локалитетот на линкот tumbamadzari.mk.
Локалитетот Тумба Маџари од 2008 година е актуелен со анимирање на јавноста преку научни, едукативни и туристички активности за сите возрасти. Во музејот под отворено „Неолитско село“ се изградени неколку куќи во духот на неолитската архитектура. Во нивната внатрешност преку копии на разновиден движен и недвижен покуќнински инвентар, како и сцени од секојдневниот живот, е направен обид за реконструкција на дел од животот на неолитскиот човек, кој живеел на територијата од Македонија и пошироко пред 8000 години.
Посетата на музејот „Неолитско село“, како и реализацијата на многубројните едукативни активности и културни манифестации во овој комплекс ќе продолжат наскоро, а дотогаш можете да направите виртуелна прошетка, чија техничка реализација и подготовка е овозможена од Дончо Наумовски и м-р Елена Стојанова Канзурова.
(Текстот е објавен во „Културен печат“ број 37, во печатеното издание на „Слободен печат“ на 27-28 јуни 2020)